مُـتَدَيـِّن ..؟

الدّينُ لا تَدينُ بِهِ بل تحياه ..

والحقُّ لا تَنتَسِبُ له بل تعيشُه..

المجد للحقيقيين قلباً وشكلاً وإن ساروا عرايا ..

-أنا

اكـْفـُرْ

اكْفُرْ بِدينِكَ الذي أُملِيتَهُ..

واتْبَعْ يَقينَكَ إن رأيْتَهُ.. لَمَسْتَهُ.. أحسَسْتَهُ.

فالرَبُّ العاجِزُ عن أن يُرِيكَ مَجْدَهُ،

لا يستحقُّ يوماً أن تعبُدَنَّهُ.

-أنا

طَفَح كيل الحياة

طَفَح كيل الحياة

ووِصِل لِمُنتَهاه..

والمتعة انك تعيش

راحِت.. خلاص.. مافيش

بس في شمعة جديدة،

نَوَّرِت عَتمِة ظلامَك

لَمَّا شُفْت ان حياتَك

مش مُهِمّ فيها راحْتَك

الْمُهِمّ تكون قيمِتْها

عند حَدّ تاني عَاوْزَك

واحتياجُه لِيك يِصَحِّي

شَهوِتَك إنك تعيش

واعتمادُه عليك ينَسِّي

ضَلمِتَك..

ومُرّ وِحدِتَك..

وسُكات غِنوِتَك.

وساعِتها الكيل اللي طَافِح

المستَمِر.. أيوة لِسَّه،

ها يخَفِّفُه نور الملامِح

اللّي لِسَّه شايفَة ان حِسَّك..

في دُنيتهُم مُهِمّ

وصُوتَك..

ف غِنوِتْهُم مُهِمّ

وسكُوتَك..

أو حتى إحساسَك بِمُوتَك وانتَ حَيّ ..

بَرضُه عندُهُم مُهِمّ

-أنا

اللي كان بياخدني ليكم ..

"ما باحبش البعاد،

ولا المسافات،

لكن اللي كان بياخدني ليكم،

جوايا مات."

-أنا

يا خسـارة ...

يا خسارة..

عَ الشَجاعة والجَسارة..

لمّا تبقَى..

ولمّا تصحَى..

ولمّا تقوم..

وصوتها يعلَى

مِن غير أَمارَة.

وتبُصّ جُوَّاك وتسأل:

"ليه الخسارة ؟"

ما يرُدّش حَد..

ما عَادْش فِي حَد..

في العُمارَة.

-أنا

بيبـــان...

بيبان..

بيبان لمّا السؤال عني بيبقَى من قلبك،

ولمّا يكون مُجرَّد واجب،

والنوع التاني ده

انا عمري

ما هاكون لُه حابِب

ولا طالِب

ولا حتي فيه.. راغِب.

-أنا

فيك شيء غريب!

مافِهْمَكش البعيد

واحتار فيك القريب،

اللي عاوِز يساعدَك

واللي عَنَّك غريب،

والكل مِش فاهم:

"مالَك؟ فيك شيء غريب!"،

أصل اللي جُوَّة قَوي

مالهوش طبيب.

-أنا

عايش ف القفص ؟

لسه عايش في القفص ؟ واللا السما هي العِشَّة ؟

بتتفرج ع الحياة، واللا عايشها ؟

بتسابق السحاب ؟ ليك مكان وِسط الأسراب ؟

واللا الشِباك قِوْيِت عليك والصيَّاد يسمع غناويك ؟

ما اشتاقتش للوطن ؟

ما اشتاقتش للحياة ؟

ما اشتاقتش للنجوم ؟

..حاول تقوم

حاول تقوم ده انت مسجون جُوَّة فكرة

حاول تقوم ده انت مستني بكرة

دي الحرية بتبتدي في القلب جُوَّة

دي الحرية شيء بناخدُه بالقُوة

صَحِّي القلب اللي انهزم ، زُقّ الفَخّ بكل عزم

طِير دي الشمس بتندهك ، عُمر الصياد ما ها يخدعك

انت حقك الحياة

انت بيتك السما

نادي فوق عَ الانسانية

اصرخ بغنوة الحرية

__________________________

كلام: منال المطيعي

لحن وتوزيع موسيقي: شريف مصطفى

غناء: هاني فخري

عود: أحمد القصبجي

أصوات مصاحبة: نادين إميل، جورج محسن، صموئيل محسن

الفيديو – بطولة: تامر عادل

منتج فني: نيفين لطفي

إخراج: رامي رزق الله

صدّقت ليه ؟؟

صدّقت ليه وَهمَك؟

وعِشته واقع لعمرك،

ونسيت انه مش حقك،

اهو آن الأوان،

وفُقت من حلمك،

وادي قلبك بيقول لك:

"ليه نسيت نفسك

وطلعت من قبرك؟"

-أنا

مصر .. العائلة

حِلّي ضفايرك ضُلّيلة
ولملمينا يا أصيلة
عُشاق تُرابك أحبابِك
وكلّنا أهل وعيلة

احنا اللي يوم الفِدا رُحنا
نفديكي ونضحي برُوحنا
وضحكنا حتى على جُروحنا
ضِحكتنا هوّنِت الشيلة
وانتي اللي نسهر في هواكي
وتدوب قلوبنا في نجواكي
ولاعمرنا نحب سواكي
ونبوس تُرابك يا جميلة

نِدّيكي حب وتِدّينا
ونمدّ للشمس ايدينا
ولو تعبنا تاخدينا
ناخد في حُضنِك تعسيلة
ونقوم ولا شيء يِوْقِفنا
لا "أبو جهل" جهله يحرفنا
ولا "أبو لَهب" حيخوّفنا
ما احناش ضُعاف قُللات حيلة

آه يا جَميلة

___________________

مقدمة مسلسل "العائلة"

شعر سيد حجاب

لحن عمّار الشريعي

غناء أنغام

البيانو ...

تِلمِس صوابعي البيانو.. واسمَعُه ،

بيترجم اللي جُوّايا مِن غير ما اتكلِّمُه ،

ما هُو ياما جُوَّة القلوب ،

بس مين يسمع صُراخها .. ويِفْهَمُه ؟؟!

-أنا

البرد مش ف الجو...

قال لَك: "مِش لاقيينها"..

وهيَّ كانت موجودَة ،

بَس مِن نخاشيشها

خَارِج دُخَّان..

"حَشيش لاجل البُرُودَة"..

البَرْد مِش فِ الجَوْ،

لكنه بَرْد القلب الفَاضِي ،

والفراغ مهما يوَدِّينا سِكَكْ

بَرضُه مسدُودَة.

-أنا

إلى الميدان ..

الى الميدان يا شباب ..

ف مسيرة..

ف دعاء..

ف لهفة المشتاق..

لحرية جاية جاية ..

حتى لو بعد عناء.

-أنا

25 يناير 2012 – دعوة لاستكمال ثورة أفسدها مجلس مبارك العسكري وركبها الاسلاميون ..