لكل اللي شايف نفسه فاشل أو أخرق..

كل الناس بتحبك

وعاوزة تساعدك

وانت مش مصدق

غير صوت زمان ندهلك

وقال لك “انت اخرق

فاشل ومش ها تفلح”

وللأسف سمعته كتير

وكمان صدّقته اكتر

وبقت كل حياتك

مأسورة ف انك “اخرق”

وحتى ف علاقاتك

مابتلومش الاّ نفسك

وكل يوم حياتك

فيها نظرة لنفسك

عاوز بيها تأكّد

انك ها تفضل اخرق

وكل اللي يساعدك

تاخد كلامه عشان

برضه تثبت لنفسك

انك أصل المشاكل

والعيب كله من عندك

وماحدش مهما قال

ها يغير فكرة عندك

ولا حاجة مهما عملوا

ها تريّحلك قلبك..

اصل السر جواك

انك كاره لنفسك

وعمرك مابتصدق

غير صوت صارخ ف جوفك

عاوز ياخدك لتحت

وانت موافق بخوفك

مع ان نجاحك باين

لكن خلاص .. عميت

عن انك حتى تشوف

غير نقطة سودا عندك

والحل اللي ف ايدك

انك تكره مش نفسك

لكن نظرتك لروحك

وعشقك على طول لفشلك

لانه دايماً اقربلك

وهو اللي أسهل لك

من إيمانك بنفسك

والكلمة اللي عندي لك

هي انك ابدا عمرك

ما هاتتقدم خطوة

من غير لما تدفن

تصديقك لفشلك

وتحيِي كل يوم

-حتي لو اتعصَرت-

إيمانك بنفسك

والا يبقى ربّك

خايب بقى كده زي وهمك..

- من رسالة مني إلى صديقي المأسور في انه "أخرق"..

فبراير 2013

تـعـبـت ...

تعِبْت..

مِ الأيـَّام..

والكلام..

والوَهْم بالاهتِمَام..

والحِرْصَ عَ الالتِئَام..

وِسْط دُنْيَا وزَمَنْ

مافيهُمْش غِير أوهَام وآلام..

وناس بتِصْحَى تجَرَّحَكْ..

وناس عَنَّك بتنَام.

-أنا

استوعب حجم خسارتك..

اسْتَوْعِب حَجْم خُسَارْتَك..

حَتَّى ان كان أكْبَر مِن كُلّ الكَلام..

ابكِيها مِن قَلبَك..

وبُصّ لقُدَّام..

مِش شايِف؟

وِمِش هاتشُوف..

طُول مَادُمُوعَك نَضَّارْتَك..

-أنا

أنـَانـِي ..

"أناني" لَمَّا تِزْعَل عَ الرحِيلْ

و"أناني" لَمَّا تِسأَل: "مَافيش بَدِيلْ..؟"

و"ما بِتفَكَّرش اللا في نَفْسَكْ"..

و زَي كِدَه كَلام كِتِير

والنتيجة: نَهَار مِغَيِّمْ

وأيَّامَك – بَسْ - لِيل

-أنا