اللي جواه نور ..

اللي جُوّاه نُور، ها ينوَّر،

ولَوْ في أَشَرّ الأماكن.

حوار إفتراضى مع فتاة ليل – شعر: عصام مقار

قُولي الحِكَاية

زَي مَا انتي بتعِيشِيها

كُل تَفصِيلة ف بالِك

حَتَّى لَو كُنتِي نسِيتِيها

قُولي كِلمَة مِن زَمان

كُنتي تِتمَنّي تقُوليها

قالت !

الحكاية مِن طريقي تَختَلِف

فيه زبون هاوي و غيرُه مُحتَرِف

بس لو تسألني أَجاوبَك:

مِن كِلاهُم باتقِرِف

باتقِرِف مِن صُوت كَلامهُم

حتىَ مِن كِذب اهتِمَامهُم

وانهم حابّينّي خالِص

و انه مِش مُهِم خالِص

رِيحتي تُخرُج مِن هُدومهُم

كذابِين كُلُّهُم لاغيين عُقُولهُم

زى الحيوانات باشُوفهُم

يِشتِكُوا قَسوِة ظُرُوفهُم

كُلُّهُم بِيِستَخَبُّوا

جُوَّه حُضنِي

و يِشتِمُونِي بين صُحَابهُم

وان انا واقفَة يُومَاتِي عند بَابهُم

وان انا رخِيصَة وكِدَه

وان انا مِتعَوّدَة

وانهُم رِجَّالَة صَح

واللي بَقَى نفسه في دح

و اني هَاريَاهُم كَلام

و هُمَّ وَلا أَيّ اهتِمَام

شِيئ بيِجرَح لما تبقَى

فِي الحَيَاة قِيمتَك فِي جِسمَك

أى واحِد وِ السَلام

كُلُّهُم بيخَبُّوا إسمَك

بَس علشَان المزَاج

او ليالِي الاحتِيَاج

الحقيقَة انهُم

زى باقي الحَيَوانَات

إِنَّما أنا دايماً باشُوفهُم

فِي مَوَاسِم الهِيَاج

مش بَاقُول لَك إِنّي حِلوَة

زَيّي زَي كُل البَنَات

بَس انا أَصرَح كِتِير

من هؤُلاءِ الحِمِير

الرجُولَة لمّا تِغلَط

تِبقَى غَلطِتهَا بضَمِير

كُلُّهُم لابسين وُشُوش

بَرَّه أُوضتِي تقُول وُحوُش

تَحت رِجلي فَشُوش فَشُوش

تِفتِكِر مِين فِينَا عَاهِر..؟

تِفتِكِر مِين الشَرِيف..؟

تِفتِكِر لَو بَصُّوا جُوَّة

يِطلَع مِين فِينا النِضِيف..؟

اللي بِتبِيع جِسمَهَا عَلَشَان رِغِيف

ولا اللي سَارِق مِنهَا حِقّ الرِغِيف..؟

عصام مقار

يبطّلوا يوعظوا ..

آه لو يبطّلوا يوعظوا،

ويبتدوا يتّعظوا..

- أنا

الحياة ما بتقفش على حد ..

الحياة ما بتقفش على حد .. 

بس بتتوقف عند ناس .. 

وبتفوت زي القطر من جنب ناس تانية ..

- أنا

سهل .. وصعب ..

يا خسارة يا زمن، فيك البني آدمين بقوا زي الفلوس،

سهل تخسرهم، وصعب تكسبهم.

- أنا

عـَن ...

عن واحد من لحم ودم كل قرايتك ليه انه بيقيّمك ويقيّم كلامك وبس..

وبِئْسَ القراية

عن واحد كل فهمك ليه انه شايف إنه صح وإنك غلط .. 

وبِئْسَ الفهم

عن واحد من لحم ودم كل استيعابك ليه انه مخلوق مجروح ولازم نستحمله .. 

وبِئْسَ الاستيعاب

عن واحد انت فاكر انك عارفه كويس قوي 

وانت طلعت عمرك ماعرفته .. 

وبِئْسَ المعرفة

عن واحد مبهدلاه الدنيا واللي فيها آخر بهدلة 

وانت اعتراضك ان طريقته أو ردود فعله مش عاجباك.. 

وبِئْسَ الاعتراض

عن واحد يلهث وراء ابتسامة تبث فيه طاقة إيجابية وتعطيه رغبة ف الحياة 

وانت تقابله ببوزك مترين .. 

وبِئْسَ اللقاء

عن واحد رفضه الناس وهجروه عشان مابقاش ف قوالبهم 

وانت تتهمه بانه عاوز يحطّك ف قالب ف خياله.. 

وبِئْسَ الاتهام

عن واحد حَكَمت عليه الحياة احكام بالكيل 

وانت جاي تحكم كمان عليه احكامك.. 

وبِئْسَ الحكم

عن انسان .. مابقاش انسان ف نظرك 

من كتر ما بتقارنه بانسانيتك العظيمة انت ومن حولك .. 

وبِئْسَ المقارنة

عنّي .. 

وعن بِئْسَ ما لاقيتُه وألاقيه من قلوب الناس .. 

أقربهم قبل أبعدهم

-أنا