.. لا حد بينفع حد
و لا حاجة بتدوم ..
لا ها تِمشي منها بحَدّ
ولا حتى بِهدوم ..
فَعَلَى إيه بَقَى بجد
نِفضَل نِشيل هُموم ؟
سَبَبْها قُرب و بُعد
لمحبوب أو مذموم ..
الحلم ده صاحي
والحلم ده ف النوم
تنزل سنين لتحت
ويوم فوق النجوم
-أنا
الكتابة هي إني أعَبَّر عن اللي جوايا، واللي جوايا كتير، حاجات تتقال في الهوا كده، وحاجات كتير تفضل في بير.. والناس تحب تقول وتعيد، من غير اعتبار، من غير فهم، من غير تفكير.. ماهو كله كلام، الناس فاكراه في الهوا بيطير.. والفرق بينا بيبقى باين في كلامنا، هل هو فارغ..؟ عابر..؟ بدون تأثير؟ واللا كلامي بيدخل جواك؟ ويسيب أثر؟ يعمل تغيير؟ يارب ياخالق الكلام واللغة، وواضع أصول التفاسير.. خلي كلامي يدوم ويبقى، وان رُحت أنا، يفضل تأثير.. تأثير يبدّل سكك، ويقلب موازين غلط، يعمل تغيير.. -أنا.. ٢١ديسمبر٢٠٠٩