ووِصِل بيك الحال، لشِحَاتِة الوَنَس
من ناس آخرها يوم توَنِّس وِحدِتَك؟
ده في ناس تانية كانت: النِفْس والنَفَس
بَقِيتْ ولا تِسوَى لهم: "قيمة جَزمِتَك" !
وناس بتوع "منابر"
ولكنهم "مقابر"
وناس بتوع كتاب "مُقَدَّس"، دَنِّسُوه
من كُتر ما اغتَابُوا وِنَمُّوا واغْتَالُوا حَتَّى اللي في
يوم زَمَان حَبُّوه.
وأكيد واجِب " مُقَدَّس" عندهم: يدَمَّرُوك
وكمان مافيش مانع "بِالآيـَة" يِدبَحُوكْ.
وناس بَدَل ما يكَلِّمُوك، اتكلِّمُوكْ
وبَدَل ما يْحَكُّوا مَعَاك، حَكُوكْ
قال يَعنِي عارفينك
ومعَاهُم "كتالوجك"
ولكُلّ كَلب في سِكَكْهُم -أو عَابِر سَبِيلْهُم- شَوِّهُوكْ.
وِناس قالِت: "صاحبنا.."
وناس قالت: "حبيبنا.."
وناس قالت: "ها نسأل.."
وع الناصية نِسيُوكْ.
اتقَال لي: "الناس ها يِفْضَلُوا -دايماً كِدَه- زبالة"
!
وانْ جِه إخلاص في يوم، ها يكون كده "حالة"
تِعدّي وتِنتِهي، وتِرجَع لِوِحدِتَك
وعُمْر ما في يوم، في حَد ها يِسنِدَك
وسَوَاء دَه كان صَحِيح وتَمَام،
أو مُجَرَّد كَلام غَلَّطِتُه الأيَام،
فَبَلاش بَقَى شحَاتَة، وقِلَّة للقِيمَة
قوم أُقَفْ وِاتشَدّ
وانسى بَقَى أيّ حَد
وان جِه في يوم انسان
كُون انتَ لُه "قيمة"
وكُون انتَ لُه وَنَس
واسنِدُه بعَزِيمَة
والحياة القُصَيَّرة لَو طالت يوم كَمان
كُون انتَ اللي ماكانوش حَد ليك زَمان
كُون انتَ اللي كان نِفْسَك يكُونُوه ليك كَمان
وان ما طالِتش الحياة
كُون الذِكرَى اللي تحُطّ ضِحكَة عَ الوشُوش
وكُون دمعة نَدَم في عيون اللي ما اشْتـَرُوش
وكُون طريق للسَما وفِكرة واقِعِيّة
إن الشخص الحقيقي، حَيَاتُه أبَدِيّة.
-أنا