الفَجر لاح بالأمل ..

الفَجر لاح بَالأَمَل: إِنّ الظَلام مُدَّة؛

وَقت ومِش دَايم، ونقُول عَلِيه "عَدَّى.."،

والنُّور يِنَوَّرنَا ويهَوّن الشِدَّة،

ويِيجِي الظَلام عَارف إِنُّه مَالُوش قَعدَة.

-  أنا

مايكَفّيش أَنَادِيك في الفَجر

مايكَفّيش أَنَادِيك في الفَجر

وبَاقِي اليُوم أَنسَاك،

ولا يِنفَعش تكُون رَبّي

وانَا عَلَى بَالِي سِوَاك،

ولا يِرضِيني غِير إِنَّك

تِملا العِين بِبَهَاك

والقلب بِهَوَاك.

-  أنا

كان نفسي ...

كان نِفسِي لَمَّا قلبي

يقول لي "دُول بَاقيِين"،

واسمَع أنا كَلامُه

ويِبقُوا مِ الغَاليِين،

كان نِفسِي مَا يِرمُونِيش..

واتمَنّيت يِبقُوا بَرَّة

زَي مَا هُمَّ جُوَّة؛

لِسَّه مَوجُودِين.

-  أنا

أَهُو دَه اللي بَقِيتُه..

أَهُو دَه اللي بَقِيتُه.. تارِيخ..

صُوت في الوِدَان يِرِنّ بغُنَا،

تِبتِسمُوا..

وِتسِدُّوا وِدَانكُم عَنُّه

وتِنـزِعجُوا..

لَـمَّا اللي طَالِع مِنُّه

يِكُون..

صِرِيخ.

-  أنا

مالكش غلاوة ..

مالكش غَلاوَة.. دَه عَادِي،

ولا لِيك شَفَقَة فِيك تِدَادِي،

وَلا مِستَاهِل سُؤَال عَلِيك،

حَتَّي لَو مِش شَايلاك رِجلِيك،

إِنتَ مِين أَصلاً ؟

إِنتَ أَبعَد مِ الأَعَادِي

- أنا