الحياة ما بتقفش على حد ..

الحياة ما بتقفش على حد .. 

بس بتتوقف عند ناس .. 

وبتفوت زي القطر من جنب ناس تانية ..

- أنا

سهل .. وصعب ..

يا خسارة يا زمن، فيك البني آدمين بقوا زي الفلوس،

سهل تخسرهم، وصعب تكسبهم.

- أنا

عـَن ...

عن واحد من لحم ودم كل قرايتك ليه انه بيقيّمك ويقيّم كلامك وبس..

وبِئْسَ القراية

عن واحد كل فهمك ليه انه شايف إنه صح وإنك غلط .. 

وبِئْسَ الفهم

عن واحد من لحم ودم كل استيعابك ليه انه مخلوق مجروح ولازم نستحمله .. 

وبِئْسَ الاستيعاب

عن واحد انت فاكر انك عارفه كويس قوي 

وانت طلعت عمرك ماعرفته .. 

وبِئْسَ المعرفة

عن واحد مبهدلاه الدنيا واللي فيها آخر بهدلة 

وانت اعتراضك ان طريقته أو ردود فعله مش عاجباك.. 

وبِئْسَ الاعتراض

عن واحد يلهث وراء ابتسامة تبث فيه طاقة إيجابية وتعطيه رغبة ف الحياة 

وانت تقابله ببوزك مترين .. 

وبِئْسَ اللقاء

عن واحد رفضه الناس وهجروه عشان مابقاش ف قوالبهم 

وانت تتهمه بانه عاوز يحطّك ف قالب ف خياله.. 

وبِئْسَ الاتهام

عن واحد حَكَمت عليه الحياة احكام بالكيل 

وانت جاي تحكم كمان عليه احكامك.. 

وبِئْسَ الحكم

عن انسان .. مابقاش انسان ف نظرك 

من كتر ما بتقارنه بانسانيتك العظيمة انت ومن حولك .. 

وبِئْسَ المقارنة

عنّي .. 

وعن بِئْسَ ما لاقيتُه وألاقيه من قلوب الناس .. 

أقربهم قبل أبعدهم

-أنا

حـَد ...

مافيش حَد بِيِسنِد حَد..

ولا حَدْ بِيِفضَل لِـ حَد ..

ولا حَدْ بِيكَمِّل يِفَاجئَكْ

بِحُبُّه وإِخلاصُه وكُتْر الوِدّ،

عشان دايماً.. دايماً

بيبقى ليهم.. حَدْ.

-أنا

لو انت صاحبي ..

لو انت صاحبي وحاسسني رافضك،

او حاسس إني –بس- على مزاجي عاوزك،

تبقي لا كنت صاحبي،

ولايوم عرفت قد إيه؛

بكل قلبي كنت ولا زلت باحبك.

- أنا